世盃決賽周即將開打，群雄紛紛「拍跳」備戰，其中4屆盟主德國主場火併芬蘭。德國雖然今仗唔齊腳，但正好畀主帥拿高斯文考驗一班邊緣人，尤其係丹尼斯烏達夫、利萊辛尼、蘭納特卡爾等，必趁機爭取表現，加上主場經常大手交易，今場隨時與芬蘭合演入球騷，3.5球大盤咪錯過。（周一凌晨2時45分開賽）文:法達斯維
德國早前已宣布參加世盃嘅26人名單，不過前鋒夏維斯啱啱先為阿仙奴打完歐聯決賽，仲未歸隊，而紐亞今仗亦因傷避戰。因此，主帥拿高斯文可以藉此試陣，始終主力陣容佢心中有數，反而Plan B仍未有定案，今仗正好可以考察一下部分邊緣人。
鋒線方面，穆斯亞拿與域斯毫無疑問係正選穩膽，但穆斯亞拿因傷抖咗半季有多，狀態得番七至八成，域斯轉戰英超又唔多順，「拿高Sir」需要諗定後備方案。好似今季喺拜仁冒起嘅超新星蘭納特卡爾，呢位18歲小伙子各項賽事已交出9個入波及7次助攻。而備受爭議嘅利萊辛尼，雖然有拿高Sir射住，但都要幫吓手踢爭氣波。
芬蘭重建防線牙煙
另邊廂，芬蘭無緣世盃決賽周，今仗純粹陪練亦趁機重建，從名單8名後衞中，有6位之前出場只達個位數字，可見防線經驗不足，很難抵擋近4次主場入15球、有3次開4球或以上嘅德國鋒線，3.5球入球大更可取。