今晚西甲壓軸尾場，巴塞隆拿主場迎戰華歷簡奴。巴塞開咧2連勝兼冇失波，不過王牌拉明耶馬明顯未弗，加上近年對親華歷簡奴都係小勝居多，「讓球主客和」讓到2球咁辣，寧捧受讓嘅華奴讓球勝（+2）。（Now 632周二凌晨3時30分直播）文:法達斯維
衞冕嘅巴塞，今季頭2輪對艾爾切同畢爾包合共派咗7蛋，費明盧比斯同拉芬夏比洛尼各有3粒進帳。不過今夏有羅拔利雲度夫斯基同費倫托利斯兩名中鋒離隊，斟祖利安艾華利斯又搞到一鑊粥，主帥費歷克都係焗用無鋒陣，就以上仗對實力稍強嘅畢爾包為例，佢哋全場22次攻門，當中有10次中龍，但只入得兩球，效率麻麻，王牌拉明耶馬2仗都冇入波或助攻，明顯未上力。
華歷簡奴死守唔易啃
另邊廂，華歷簡奴狀態一般，頭2輪僅得1和1負，不過反輸畀西維爾1比2之役，兩個失波都係12碼，今仗造訪巴塞必定死守，只求輸少當贏。翻查紀錄，雙方之前4次碰頭，巴塞雖然取得3勝1和佳績，但3場勝仗都係險勝1球，可見華奴硬淨唔易啃，既然巴塞「讓球主客和」要讓到2球咁多，即係華奴輸1粒都贏盤，轉捧佢哋讓球勝（+2）更上算。