阿根廷球員向來鬥心高，踢法勇悍有球味，但同時容易情緒化。利辛度馬天尼斯今季滿肚鬱結，結果多次在場上爆發，周六英超短短四分鐘內兩黃一紅被逐兼輸十二碼，讓上半場形勢好的曼聯再輸一場。
有球迷指卡域克於馬天尼斯早前「爆seed」公開炮轟高層後，就唔應該再用他，如今出事是咎由自取，但問題係唔用利馬，還有其他可靠的中堅可用嗎？紅魔陣中另一位左中堅是艾登希雲，但他質新尚未成熟，季前賽和季初比賽多甩漏，用唔到；其他中堅馬菲斯迪列特就剛傷瘉無狀態；約羅就時好時壞未能擔當重任；馬沙拉奧又越踢越差，拉入中路客串都係信唔過。卡域克手執「天殘地缺」的兵源，有風險都要焗用馬天尼斯。
背後最大的問題，還是出於體育總監韋確斯，負責引援的他明知防線問題多多，都沒有作出應對方案，令卡帥受苦，令利馬自爆。受球會財政情況限制，要謹慎理財大家都明，但韋確斯辦事不力無用其他方法，今夏馬高辛尼斯、安德魯羅拔臣等英超經驗豐富戰將回復自由身，他沒有爭取簽人；熱刺用財技先借後買斷引入馬莫殊，紅魔都可以用類似方式引援解決燃眉之急，他同樣無做。一直有指韋確斯的人脈網絡差，利馬自爆自身問題大、卡帥未能好好應對亦是問題所在，但韋確斯同樣責無旁貸﹗